Martxoaren 31n, DBH 3. mailako ikasleak Bilbon izan ginen. Rekaldeberri BHIko ikasleekin hitzordua genuen eta, euren azalpen eta egindako dinamiken bidez, Bilboko Alde Zaharra ezagutzeko aukera izan genuen. Eguraldiak ez zigun gehiegi lagundu, baina goiz pasa polita izan zen.

DBH 4ko ikasleek Inauterietan antolatu zuten zozketak badu zenbaki saritua: 2.696. Saridunak apirilaren 8ra arteko epea (egun hau barne) izango du gure ikasleekin harremanetan jartzeko; horretarako idatzi helbide elektroniko honetara: ikasbidaia06@gmail.com. Saria Bittarte jatxetxeko bi lagunentzako asteburuko menua da.

Atzo, martxoaren 23an, 4. DBH eta 1. Batxilergoko ikasleek Axut! konpainiaren Amua antzezlana ikusteko aukera izan zuten Zumaiako Aita Mari aretoan.

Horren aurretik, ikasle guzti horiek, Konpainiako kide diren Arantxa Hirigoien eta Manex Fuchs-en eskutik antzerki tailer bat izan zuten ikastetxean bertan. Argazki hauek tailer horietan eginikoak dira.

Emanaldia amaitu bezain pronto, gure ikasleek solasaldia izan zuten parte hartu zuten antzezleekin. Horrez gain, Arantxa Hirigoienek prestatutako txosten pedagogikoa landuko dute ikasleek hainbat saioetan.

Parisen izan ziren Zumaia BHI-ko ikasle batzuk irakasleen laguntzarekin. Frantsesa ikasten dutenek aukera izan zuten Pariseko bizimodua usaindu eta kaleak bertatik bertara ezagutzeko. Primeran ibili ziren, maitasunaren eta artisten hiriko txokorik esanguratsuenak ikusi zituzten: Tour Eiffel, Montmartre, Louvre Museoa, Champs Elysées, Quartier Latin, Place de la Bastille, Jardin du Luxemburg eta Arc de Triomphe. “Bidaia ahaztezina izan da eta Parisen sortutako oroimenak betirako izango dira.” diote ikasleek.